دنیا میں اچھے سے اچھے آئیڈیاز بنائے جاسکتے ہیں، انسانوں کی فلاح و بہبود کے لیے بہترین پروجیکٹ پیش کیے جاسکتے ہیں، ملکوں کو چلانے کے لیے بہترین قوانین ترتیب دیے جاسکتے ہیں لیکن اگر ان سب چیزوں کی پشت پر عملی مثال نہ ہو تو دنیا کی تاریخ میں ایسے آئیڈیاز، پروجیکٹ اور قوانین کی موجودگی بے معنی ہوگی۔ انسان کی فطرت ہے کہ وہ آئیڈیل کی تلاش میں ہوتا ہے۔ جہاں اس کو عملی نمونہ ملتا ہے وہیں اس کی پیاس بجھتی ہے۔

انسان کی یہ فطرت خالق کائنات نے بنائی ہے۔ اس سے زیادہ اس کی فطرت سے اور کون واقف ہوسکتا ہے؟ اس ذات نے انسانوں کے لئے صرف ہدایت نامہ بھیجنے ہی پر اکتفا نہیں کیا بلکہ ہر ہدایت نامہ کے ساتھ انسانوں میں سے اپنے منتخب بندوں کو کھڑا کیا تاکہ وہ اس ہدایت نامہ کی عملی مثال بن کر انسانوں کو صحیح راستہ دکھائیں۔ ایسے انسانوں کو ہم انبیاء و رسل کے نام سے جانتے ہیں۔ یہ وہ ہیں جن کی اقتداء و پیروی ہی میں انسانیت کی معراج ہے۔ اُولٰٓئِكَ الَّذِيۡنَ هَدَى اللّٰهُ‌ فَبِهُدٰٮهُمُ اقۡتَدِهۡ ۔ ترجمہ: یہی وہ لوگ ہیں جنہیں اللہ نے ہدایت سے نوازا، پس تم انہیں کی پیروی کرو۔ (الانعام: 90)

نبیوں اور رسولوں کا یہ سلسلہ حضرت محمد صلی اللہ علیہ وسلم پر ختم ہوجاتا ہے۔ اب قیامت تک کوئی اور نبی یا رسول نہیں آئے گا۔ آپ خاتم النبیین ہیں۔ ما كَانَ مُحَمَّدٌ اَبَآ اَحَدٍ مِّنۡ رِّجَالِكُمۡ وَلٰـكِنۡ رَّسُوۡلَ اللّٰهِ وَخَاتَمَ النَّبِيّٖنَ ؕ وَكَانَ اللّٰهُ بِكُلِّ شَىۡءٍ عَلِيۡمًا ۔ ترجمہ:

( مسلمانو ! ) محمد ﷺتم مردوں میں سے کسی کے باپ نہیں ہیں ، لیکن وہ اللہ کے رسول ہیں ، اور تمام نبیوں میں سب سے آخری نبی ہیں ۔: الاحزاب: 40) آپ کا اسوہ ہی عالم انسانیت کے لیے مشعل راہ قرار پایا۔لَقَدۡ كَانَ لَكُمۡ فِىۡ رَسُوۡلِ اللّٰهِ اُسۡوَةٌ حَسَنَةٌ لِّمَنۡ كَانَ يَرۡجُوا اللّٰهَ وَالۡيَوۡمَ الۡاٰخِرَ وَذَكَرَ اللّٰهَ كَثِيۡرًا ۔ ترجمہ: (درحقیقت تم لوگوں کے لیے اللہ کے رسولؐ میں ایک بہترین نمونہ ہے ، ہر اُس شخص کے لیے جو اللہ اور یومِ آخر کا اُمید وار ہو اور کثرت سے اللہ کو یاد کرے. (الاحزاب: 21) ہر قسم کی فوز و فلاح صرف آپ صلی اللہ علیہ وسلم کی ذاتِ مبارکہ سے وابستہ کردی گئی ہے۔

اَ لَّذِيۡنَ يَتَّبِعُوۡنَ الرَّسُوۡلَ النَّبِىَّ الۡاُمِّىَّ الَّذِىۡ يَجِدُوۡنَهٗ مَكۡتُوۡبًا عِنۡدَهُمۡ فِى التَّوۡرٰٮةِ وَالۡاِنۡجِيۡلِ يَاۡمُرُهُمۡ بِالۡمَعۡرُوۡفِ وَيَنۡهٰٮهُمۡ عَنِ الۡمُنۡكَرِ وَيُحِلُّ لَهُمُ الطَّيِّبٰتِ وَيُحَرِّمُ عَلَيۡهِمُ الۡخَبٰۤئِثَ وَيَضَعُ عَنۡهُمۡ اِصۡرَهُمۡ وَالۡاَغۡلٰلَ الَّتِىۡ كَانَتۡ عَلَيۡهِمۡ‌ ؕ فَالَّذِيۡنَ اٰمَنُوۡا بِهٖ وَعَزَّرُوۡهُ وَنَصَرُوۡهُ وَ اتَّبَـعُوا النُّوۡرَ الَّذِىۡۤ اُنۡزِلَ مَعَهٗ ۤ‌ ۙ اُولٰۤئِكَ هُمُ الۡمُفۡلِحُوۡنَ۔ ترجمہ: ﴿پس آج یہ رحمت اُ ن لوگوں کا حِصہ ہے﴾ جو اِس پیغمبر نبی اُمّی کی پیروی اختیار کریں  جس کا ذکر اُنہیں اپنے ہاں تورات اور انجیل میں لکھا ہوا ملتا ہے۔ وہ انہیں نیکی کا حکم دیتا ہے، بدی سے روکتا ہے، ان کے لیے پاک چیزیں حلال اور ناپاک چیزیں حرام کرتا ہے، اور ان پر سے وہ بوجھ اتارتا ہے جو اُن پر لدے ہوئے تھے اور وہ بندشیں کھولتا ہے جن میں وہ جکڑے ہوئے تھے۔لہٰذا جو لوگ اس پر ایمان لائیں اور اس کی حمایت اور نصرت کریں اور اُس روشنی کی پیروی اختیار کریں جو اس کے ساتھ نازل کی گئی ہے، وہی فلاح پانے والے ہیں۔ (الاعراف: 157)

اہل اسلام رسول اللہ کی پیروی کا دم بھرتے ہیں لیکن پھر بھی وہ پوری دنیا میں تختہ مشق بنے ہوئے ہیں۔ رسول قائد کی پیروی کا دعویٰ اور ذلت و رسوائی جمع نہیں ہوسکتے۔ ہمیں یہ ماننا پڑے گا کہ ہم رسول اللہ کی پیروی حقیقی معنوں میں نہیں کررہے ہیں۔ ہمیں ذلت و رسوائی کی دلدل سے نکلنا ہے تو رسول اللہ سے اپنا تعلق حقیقی اور شعوری طور پر استوار کرنا ہوگا۔

محبت اور اتباع کے تعلق کی استواری ہمیں نبوی مشن کے لیے سرگرم کر دے گی۔ یہ حرکت اور سرگرمی ہی انقلاب کی نوید ہوگی۔ اس کے نتیجے میں جہاں اہل ایمان اپنا کھویا ہوا مقام حاصل کریں گے وہی عالم انسانیت کے لیے قندیل رہبانی بن کر دنیا کو امن و عدل کا گہوارہ بنا سکیں گے۔ آئیے عہد کریں کہ اسوہ نبوی کا بھولا سبق دوبارہ یاد کیا جائے۔

حالات سے سطحی واقفیت رکھنے والا مسلمان بھی اس بات سے واقف ہوگا کہ رسول پاک کی ذات گرامی کو دشمنان اسلام نشانہ بناتے رہتے ہیں۔ آپ کی تعلیمات کو نقصاندہ ثابت کرنے کے لیے علمی سطح پر بھی اعتراضات کی بڑی تعداد ہے۔ ان اعتراضات کا سامنا تعلیم یافتہ طبقہ ہر سطح پر کررہا ہے لیکن اکثریت کے پاس ان اعتراضات کے جوابات نہیں ہوتے اور بسااوقات وہ دشمنوں کے اعتراضات کا شکار ہوکر منفی رخ اختیار کرلیتے ہیں۔ ہم دیکھتے ہیں کہ اپنوں ہی میں سے بعض لوگ کہتے نظر آتے ہیں کہ رسول پاک کی مکی زندگی کو اسوہ بنانا چاہیے مدنی زندگی کو نہیں۔ کچھ لوگ غزوات نبوی کی عجیب وغریب تاویلات کرتے نظر آتے ہیں اور جہاد کو جزیرۃ العرب تک ہی محدود ماننے کا بیانیہ پیش کررہے ہیں۔ میثاقِ مدینہ اور صلح حدیبیہ کو صلح کل اور سیکولر ریاست کے لیے دلیل کے طور پر پیش کرتے نظر آتے ہیں، غرض یہ کہ رسول پاک کی زندگی کو کچھ اس طرح معذرت خواہانہ انداز میں پیش کرتے ہیں کہ اس سے دشمنان اسلام کو خوش کیا جاسکے۔ اس کورس کے ذریعے ہم ان اعتراضات کو بھی ایڈریس کریں گے اور یہ کوشش کریں گے کہ کورس کی تکمیل تک طالب علم اس درجہ میں پہنچ جائے کہ اس کے نزدیک رسول پاک ذات ہی تاریخیت، عملیت، جامعیت اور کاملیت کے اعتبار سے اسوہ قرار پائے اور وہ اپنی قولی و عملی زندگی سے اس کا ثبوت دینے کی پوزیشن میں ہو۔

اس کورس کے بارے میں:

اس کورس کے ذریعے رسول پاک کی صرف تاریخی شخصیت کو ہی بیان نہیں کیا جائے گا بلکہ دروس و نصائح/ فقہ السیرہ پر خصوصی توجہ دی جائے گی، نیز عصر حاضر میں سیرت کے واقعات کی تطبیق کی کوشش بھی کی جائے گی اور فکر کی اصلاح بھی کی جائے گی۔ سیرت کو اس طرح پڑھا جائے کہ آج بھی ہماری نجات اسوۂ رسول ہی بن جائے، یہ بنیادی مقصد ہوگا۔

پورے کورس میں طلبہ کو سیرت کے مختلف ابواب تفصیل سے پڑھائے جائے گے، تاکہ ایسے مضبوط افراد کو تیار کیا جا سکے جو وقت کے چیلنجوں کا مقابلہ کرنے کے قابل ہوں، اس کورس کی جامعیت اسے دوسروں سے ممتاز بناتی ہے، جس میں ایک سال کے عرصے میں ہر ہفتہ صرف دو کلاس ایک ایک گھنٹے کی ہوگی۔ سال بھر میں اس طرح 96 کلاسیں ہونگی۔

کورس کے زیادہ سے زیادہ فائدہ مند بنانے کے لیے اس کو سادہ زبان میں رکھا گیا ہے جس سے تمام گروپس (مرد، خواتین ،نوجوان، بوڑھے، کام کرنے والے، غیر کام کرنے والے، گھریلو خواتین) بلا معاوضہ کلاس میں شرکت کر سکتے ہیں۔

کورس کے مقاصد:

1. سیرت اور فقہ السیرہ کا علم۔
2. شخصیت سازی اور اس کا ارتقاء۔
3. عصری مسائل کا فہم اور سیرت پاک سے اس کا حل پیش کرنا۔
4. حب نبوی سے حقیقی واقفیت۔
5. امت کے رشتے کو رسول پاک سے مضبوط کرنا۔

کورس کے فوائد ۔ اس کورس کے نتیجے میں آپ اس قابل ہو جائیں گے۔

1. اس کورس کے نتیجے میں ایسے افراد تیار ہوںگے جو کسی بھی میدان میں رہ کر دین کی خدمت کرنے کی پوزیشن میں ہونگے۔
2. مشکل حالات میں دین پر استقامت آسان ہوگی۔
3. دشمناں اسلام کی سازشوں کو سمجھنا اور ان کا توڑ پیدا کرنا آسان ہوگا۔
4. اسلام کی دنیا کے سامنے صحیح تصویر پیش کرنا آسان ہوگا۔
5. ملت کے اتحاد کی کوششوں میں کامیابی کے امکانات میں اضافہ ہوگا۔